கதம்பம் – ஆசிரியருரை

“யாமறிந்த மொழிகளிலே தமிழ்மொழி போல்

இனிதாவது எங்கும் காணோம்.”

அன்பார்ந்த மிச்சிகன் தமிழ்ச் சங்க உறுப்பினர்களுக்கு வணக்கம்!

நமது மிச்சிகன் தமிழ்ச் சங்கத்தின் தூண்களாக விளங்கும் உங்களைப் போன்ற அன்பான உறுப்பினர்களின் பங்களிப்பினால்தான் கதம்பம் இதழ் தொடர்ந்து சிறப்புடன் வெளிவந்து கொண்டிருக்கிறது. நம் தமிழின் இனிமையையும், நம் சமூகத்தின் திறமைகளையும், எண்ணங்களையும் ஒன்றிணைக்கும் ஒரு அழகிய தளமாக கதம்பம் தொடர்ந்து பயணித்து வருகிறது. 

“தேமதுரத் தமிழோசை உலகமெலாம் பரவும் வகை செய்தல் வேண்டும்” என்ற பாரதியாரின் கனவை நினைவில் கொண்டு – கல்வெட்டில் தொடங்கி, ஓலைச்சுவடியில் வளர்ந்து, இலக்கியத்தில் செழித்து, இன்று கணினி மற்றும் இணையம் வரை பயணிக்கும் தமிழ் மொழியின் பெருமையையும், நம் மக்களின் படைப்பாற்றலையும் மேலும் பலரிடம் கொண்டு சேர்ப்பதே எங்களின் விருப்பம்.

அந்த வகையில், முத்துவேலாயுதம் ஆறுமுகம் மற்றும் விஜயலட்சுமி வீரபத்திரன் ஆகிய நாங்கள் இருவரும் கதம்பம் இதழின் பொறுப்புகளை ஏற்றுக்கொண்டு, உங்களுக்காகப் பணியாற்றத் தொடங்கியுள்ளோம். சிறந்த கட்டுரைகளையும், சுவாரஸ்யமான படைப்புகளையும் உங்களிடம் கொண்டு சேர்க்க எங்களால் இயன்றவரை தொடர்ந்து முயற்சி செய்வோம்.

இதழாசிரியர் குழுவில் இருக்கும் நாங்களும் உங்களைப் போன்ற தன்னார்வலர்கள்தான்; தமிழ் அறிஞர்களோ பேரறிஞர்களோ அல்ல. தமிழ் மொழியின் மீதும், நம் சமூகத்தின் மீதும் கொண்ட அன்பும் பற்றும் காரணமாக, இந்தப் பொறுப்பை மகிழ்ச்சியுடன் ஏற்றுக்கொண்டுள்ளோம்.

ஆனால், கதம்பத்தின் உண்மையான பலம் அதன் வாசகர்களான நமது உறுப்பினர்களின் பங்களிப்பில்தான் உள்ளது. உங்கள் வீட்டுச் சிறார்கள் முதல் பெரியவர்கள் வரை ஒவ்வொருவரிடமும் பகிர்ந்து கொள்ள ஒரு கதை, கவிதை, சிந்தனை அல்லது தனித்துவமான திறமை இருக்கிறது. அவற்றை கதம்பத்தின் பக்கங்களில் வரவேற்கிறோம். பல மலர்கள் சேர்ந்து மணம் தருவது போல, பல குரல்கள் இணைந்தால்தான் ஒரு கதம்பம் அழகாகிறது!

உங்கள் எண்ணங்களும், கற்பனைகளும், படைப்புகளும் கதம்பத்தின் பக்கங்களை அலங்கரிக்கட்டும். உங்கள் கதைகள், கவிதைகள், கட்டுரைகள், ஓவியங்கள் மற்றும் ஆக்கப்பூர்வமான படைப்புகளை எங்களுடன் பகிர்ந்து, கதம்பத்தை இன்னும் சிறப்பாக்குங்கள்!

உங்களோடு இணைந்து, நம் கதம்பத்தை நம் படைப்புகளால் அழகுபடுத்த ஆவலுடன் காத்திருக்கிறோம்.

“எங்கள் வாழ்வும் எங்கள் வளமும்

மங்காத தமிழென்று சங்கே முழங்கு!”

நன்றி! வணக்கம்!

முத்துவேலாயுதம் ஆறுமுகம் & விஜயலட்சுமி வீரபத்திரன்

இதழாசிரியர் குழு – கதம்பம்
மிச்சிகன் தமிழ்ச் சங்கம்